Танилцуулга

НУТАГ ДЭВСГЭРИЙН ОНЦЛОГ

Улаанбаатар хотын зүүн талд байрлах Баянзүрх дүүрэг нь нийслэлийн хамгийн том дүүрэг юм.  Богд Хан Уулын Бага тэнгэр, Богино Хүрхрээ, Чулуут, Бумбат, Залаат, Төр хурах ам болон Хар усан тохой зэрэг ан амьтан, цэцэг жимс, ой мод, рашаан ус, эмийн ургамал бүхий үзэсгэлэнт сайхан байгалийг цогцлоон  нийт 124.4 мянган га газрыг хамарч оршдог. Монгол Улсын хүн амын 10 хувь, Нийслэл хотын хүн амын 30 гаруй хувь нь амьдардаг нийслэлийн онцгой төвлөрсөн бүс билээ.

Дүүрэг анх 1965 оны 4 дүгээр сард Бүгд Найрамдах Монгол ард Улсын Ардын их хурлын тэргүүлэгчдийн 79 дүгээр зарлигаар Найрамдалын район нэртэй байгуулагдаж, 1992 онд УИХ-ын 18 дугаар тогтоолоор "Баянзүрх" хэмээн нэрлэгджээ.

ХҮН АМ, НЭГЖИЙН ЗОХИОН БАЙГУУЛАЛТ

2020 оны жилийн эцсийн байдлаар 104,800 өрхийн 367,700 хүн амьдарч байна. Засаг захиргааны анхан шатны нэгж болох 28 хороотой.  Төрийн үйлчилгээний 37 байгууллага үйлчилгээ явуулж байна. Үндсэн 8 хэлтэстэй. Үүнд: Төрийн захиргааны удирдлагын хэлтэс; Санхүү, төрийн сангийн хэлтэс;  Төлөвлөлт, гүйцэтгэлийн хяналт, шинжилгээний хэлтэс; Нийгмийн хөгжлийн хэлтэс; Тохижилт, нийгмийн аж ахуйн хэлтэс; Хүнс,худалдаа, үйлчилгээний хэлтэс; Цэргийн штаб; Хууль, эрх зүйн хэлтэс зэрэг багтана.

Мөн харьяа 29 хэлтэстэй. Үүнд: Татварын хэлтэс, Эрүүл мэндийн төв, Цагдаагийн газар, Газар зохион байгуулалтын алба, Хөгжлийн төв, Албан бус-Насан туршийн боловсролын төв, Ахмадын хороо, Биеийн тамир, спортын хороо; Гэр бүл, хүүхэд, залуучуудын хөгжлийн хэлтэс, Дотоод Аудитын алба, Жижиг дунд үйлдвэрийг дэмжих төв, Мал эмнэлгийн тасаг, Мэргэжлийн хяналтын хэлтэс, Нийтлэг үйлчилгээний газар-4, Онцгой байдлын хэлтэс, Соёлын ордон, Статистикийн хэлтэс, Улаан заламгайн хороо, Улсын бүртгэлийн хэлтэс, Усан спорт сургалтын төв, Хөдөлмөр халамжийн үйлчилгээний хэлтэс, Цагдаагийн хэлтэс-3, Нийгмийн даатгалын хэлтэс, Худалдан авах ажиллагааны алба зэрэг орж байна.

ҮЙЛ АЖИЛЛАГАА ЯВУУЛЖ БУЙ БАЙГУУЛЛАГА, ААН

Дүүргийн хэмжээнд 2020-2021 оны байдлаар ерөнхий боловсролын 63 сургууль үйл ажиллагаа явуулж байгаагаас төрийн өмчийн 36, хувийн хэвшлийн 29 сургууль, сургуулийн өмнөх боловсролын 189 байгууллага үйл ажиллагаа явуулж байгаагаас төрийн өмчийн 49 цэцэрлэг, хувийн хэвшлийн 111 цэцэрлэг байна. 

Түүнчлэн 31,165 байгууллага аж ахуйн нэгж үйл ажиллагаа явуулж байгаа юм. Харин эрүүл мэндийн томоохон байгууллагууд болох ХӨСҮТ, ХСҮТ, СЭСҮТ, Клиникийн 2 дугаар эмнэлэг, Цэргийн госпиталь, 3 дугаар амаржих газар, Клиник сувилалын 40 дүгээр ясли зэрэг эрүүл мэндийн байгууллагууд иргэдэд нарийн мэргэжлийн болон суурь, анхан шатны тусламж үйлчилгээг чанартай хүртээмжтэй, шуурхай хүргэж байна. 

Мөн Баянзүрх дүүрэгт Монгол Улсын Шинжлэх ухааны академи, түүний харьяа 6 хүрээлэн, Оросын соёл шинжлэх ухааны төв, Батлан хамгаалах яам байрладаг. Тус дүүрэгт бүх шатны боловсролын байгууллагууд төвлөрсөн.