| Утас: 51-263140
Соёлын дэд сайд М.Батбаяр Баянзүрх дүүрэгт ажиллалаа
Соёлын тухай хууль, “Алсын хараа-2050” Монгол Улсын урт хугацааны хөгжлийн бодлого, Засгийн газрын 2020-2024 оны үйл ажиллагааны хөтөлбөрийн холбогдох заалт болон бусад бодлогын бичиг баримтад заасны дагуу нийслэлийн ерөнхий боловсролын сургуулиудын ахлах ангийн сурагчдад зориулсан “Соёлын эрхийн бичиг”-ийн тандалт судалгааг Соёлын яам, Нийслэлийн Соёл урлагийн газар, Нийслэлийн Боловсролын газраас хамтран хэрэгжүүлэн ажиллаж байна.
Энэхүү тандалт судалгааны ажлын хүрээнд Соёлын дэд сайд М.Батбаяр холбогдох албаны хүмүүстэй Баянзүрх дүүрэгт ажиллалаа.
Энэ үеэр Баянзүрх дүүргийн Засаг даргын Орлогч Г.Жаргалсайхан, Засаг даргын Тамгын газрын хэлтсийн дарга нар, холбогдох мэргэжилтнүүд, Боловсролын хэлтсийн дарга, Соёлын ордны дарга нар хүлээн авч, дүүргийн төрийн болон төрийн бус өмчийн ЕБС-ийн удирдлагыг оролцож, санал солилцлоо.
Соёлын хүртээмж орон нутаг төдийгүй нийслэлд ч тааруу байгааг судалгаагаар тогтоосон тул энэ сард ахлах ангийн сурагчдад үнэ төлбөргүй соёлын үзүүлбэрүүдийг үзүүлэхээр төлөвлөж байгаа бөгөөд сурагчид ямар үзвэр үйлчилгээ үзэх сонирхолтой байгааг энэхүү “Соёлын эрхийн бичиг”-ийн тандалт судалгаагаар тодорхойлох юм байна.
