Эрхэм  хүндэт Баянзүрх дүүргийн иргэн танд энэхүү өдрийн мэндийг хүргэе.

Баянзүрх дүүрэг нь 1965 оны 4 дүгээр сард Бүгд Найрамдах Монгол ард Улсын Ардын их хурлын тэргүүлэгчдийн 79 дүгээр зарлигаар Найрамдалын район нэртэйгээр 65 мянган га нутаг дэвсгэртэй, 30 мянган хүн ам, орон сууцны гудамжны 3 хороотой нутаг дэвсгэрийн засаг захиргааны нэгж болж үүсэн байгуулагдсан түүхтэй. Харин өдгөө 104,881 өрх, 383,892 хүн амтай, Засаг захиргааны нэгж болох 43 хороотой нийслэлийн хамгийн том дүүрэг болсон байна.

Дүүрэг өдрөөс өдөрт хаяа тэлэн хөгжиж байгаагаас гадна бид иргэндээ ээлтэй дүүргийг бий болгохоор хичээн ажиллаж байна. Энэ хүрээнд дунд хугацаанд хэрэгжих хөгжлийн зураглалаа боловсруулсан.  Баянзүрх дүүрэг нь байгаль, нийгэм, эдийн засгийн нөөц боломжоо ашиглан иргэдийнхээ сурч боловсрох, ажиллаж хөдөлмөрлөх, эрүүл аюулгүй орчинд амьдрах нөхцөлийг бүрдүүлэхийн тулд энэхүү баримт бичгийг боловсруулсан юм. Хөгжлийн зураглал нь Алсын хараа 2050, Улаанбаатар хотыг 2040 он хүртэл хөгжүүлэх ерөнхий төлөвлөгөөтэй уялдаж байгаа юм.

2022 оныг “Хөрөнгө оруулалт бүтээн байгуулалт”-ын жил болгон зарлаж, тохижилт бүтээн байгуулалтын олон ажлыг хийсэн. Эдгээр ажлуудаа цаашид үргэлжлүүлэхээс гадна бид 2023 оныг “Хүний хөгжил”-ийн жил бол зарлаж иргэд эрүүл, аюулгүй орчинд амьдрах боломжийг бүрдүүлэх, төрийн үйлчилгээг иргэндээ ойртуулах, иргэдээ дэмжсэн олон талт үйл ажиллагааг хийж хэрэгжүүлэхээр төлөвлөж байна.

2030 он гэхэд Баянзүрх дүүрэг  үйлдвэрлэл үйлчилгээ хөгжсөн, өрсөлдөх чадвартай дүүрэг болох зорилго дэвшүүлсэн. Энэ зорилгод хүрэхэд иргэн таны оролцоо хамгийн чухал.

Богд Хан Уулын Бага тэнгэр, Богино хүрхрээ, Чулуут, Бумбат, Залаат, Төр хурах ам болон Хар усан тохой зэрэг үзэсгэлэнт байгалийг цогцлоон оршдог Баянзүрх дүүргийн иргэд та бүхэндээ аз жаргал, сайн сайхан бүхнийг хүсье.

Хүндэтгэсэн: Баянзүрх дүүргийн Засаг дарга Н.БАЯРМӨНХ