Тухайн байгууллагаас иргэдэд үзүүлдэг төрийн үйлчилгээний талаарх мэдээлэл, бүрдүүлэх бичиг баримт гэх мэт. Статистикийн мэдээлэл нь албан ёсны болон захиргааны гэсэн 2 төрөл байна. Албан ёсны статистикийн мэдээллийг Үндэсний Статистикийн хороо, яам, төрийн бусад албан газар, бүх шатны Засаг дарга эрхлэн гаргадаг. Албан ёсны статистикийн мэдээлэл гэж Үндэсний Статистикийн хорооноос баталсан аргачлал, үзүүлэлтээр Статистикийн тухай хуулийн 6 дугаар зүйлд заасан эдийн засаг, хүн ам, нийгэм, байгаль орчны холбогдолтой үзүүлэлтээр гаргасан мэдээлэл, статистикийн үйл ажиллагааны хөтөлбөрт тусгагдсан мэдээлэл юм. Захиргааны статистикийн мэдээллийг Үндэсний Статистикийн хорооноос баталсан, зөвшөөрсөн аргачлал, үзүүлэлтээр яам, Засгийн газрын агентлаг, төрийн бусад байгууллага, нутгийн захиргааны байгууллагын хэрэгцээнд зориулан цуглуулж боловсруулдаг. Дүүргийн Статистикийн хэлтэс нь долоо хоног, сар, улирал, хагас жил, бүтэн жилийн давтамжтай албан ёсны статистикийн 59 төрлийн мэдээ тайлан, захиргааны статистикийн 15 төрлийн мэдээг дүүргийн нутаг дэвсгэрт үйл ажиллагаа явуулахаар бүртгүүлсэн 15 мянган аж ахуйн нэгж, байгууллагаас авч нэгтгэн боловсруулан ажилладаг.