Баянзүрх дүүргийн 11 хороо нь анх 1956 оны 07-р сарын 10-ны өдрийн 1 дүгээр тогоолоор Найрамдлын районы 11 дүгээр хороо болон үүсэн байгуулагдаж улмаар УИХ-ын 1992 оны 8-р сарын 18-ны өдрийн 18 дугаар тогтоолоор Баянзүрх дүүргийн 11 дүгээр хороо болон өргөжсөн. 35.5 мянган га газар нутагтай, Дархан цаазат Богдхан уул бүхлээрээ манай хорооны нутаг дэвсгэрт ордог. Хойд талаараа Баянзүрх дүүргийн 20-р хороо, зүүн талаараа Налайх дүүрэг, зүүн урд талаараа Төв аймгийн Сэргэлэн сум, баруун талаараа БЗД-ийн 36, 23-р хороодтой хиллэдэг.

ХАӨМ Санд бүртгэлтэй 3491 өрхийн 9758 хүн амтай. Нийт хүн амын 11% нь орон сууцанд, 89% нь гэр хороололд амьдардаг гэсэн судалгаа бий. Манай хорооны эрхэм зорилго бол “Төрийн үйлчилгээг иргэдэд түргэн шуурхай хүргэх, үйл ажиллагаагаараа жишиг хороо болох” юм.

Тус хороо нь Улаанбаатар хотоос алслагдсан байршилтай, байгалийн үзэсгэлэнт Богдхан уулын Их, бага тэнгэрийн ам,  Залаат, Чулуут Харганат, Төр хурах, Шажин хурах, Шавартай, Бумбат, Ширдэгт зэрэг амуудтай. Амралт жуулчны баазууд, “Сансар”, “Оргил”, “EFES” гэх томоохон худалдааны төвүүд, үйлдвэр үйлчилгээний газрууд зэрэг нийт 148 аж ахуйн нэгжүүд нутаг дэвсгэрийн хэмжээнд үйл ажиллагаа явуулдаг.

Хүн амын амьжиргааны түвшин дунджаас доогуур, малчин болон мал бүхий 216 өрхийн 12.162  толгой малтай.