Баянзүрх дүүрэг нь 1965 оны 4 дүгээр сард Бүгд Найрамдах Монгол Ард Улсын Ардын Их Хурлын тэргүүлэгчдийн 79 дүгээр зарлигаар Улаанбаатар хотын зүүн хэсэгт 65 мянган га нутаг дэвсгэрт Найрамдлын район нэртэй байгуулагдаж, 1992 онд Улсын Их Хурлын 18 дугаар тогтоолоор Баянзүрх дүүрэг гэгдэх болжээ.

     Баянзүрх дүүргийн 18 дугаар хороо нь Улсын Их Хурлын 1992 оны 08 дугаар сарын 18-ны өдрийн 18 дугаар тогтоолоор Баянзүрх дүүргийн 15 дугаар хорооноос салж 1294 өрх, 3882 гаруй суурин хүн амтайгаар 10, 11, 12, 13, 14, 22а зэрэг байруудтайгаар үйл ажиллагаагаа явуулж эхэлсэн.
     “Шинээр байгуулагдсан хороодын нутаг дэвсгэрийн заагийг тогтоох тухай” Нийслэлийн Иргэдийн төлөөлөгчдийн хурлын 2022 оны 05 дугаар сарын 30-ны өдрийн 43 дугаар тогтоолоор тус хорооноос 18 орон сууцны байр (37, 38, 36в, 36/2, 48а, 39а, 39, 39б, 39в, 39г, 171а, 171б, 171в, 171а өргөтгөл, Гангар 40, Эрэл 40, 41, 41б) баянзүрх дүүргийн 25 дугаар хороо руу шилжсэн. Одоогоор 29 орон сууцны байр (13, 61, 9а, 9б, 9в, 9г/44/, Аском, Хаан шонхор, 11, 11а, 11б, 75а, 75б, 23/2, 10, 10/1, 27/1, 27/3, 24в/г/, 24/3, 24, 24а, 24б, 14, 22а, 15, тохилог16) байдаг.

     Баянзүрх дүүргийн 18 дугаар хороо нь одоогийн байдлаар 2547 өрхийн 10576 гаруй  хүн ам оршин суудаг дан орон сууцны хороо юм. 24 га (241499,24м2) нутаг дэвсгэртэй.

     Урд талаараа Баянзүрх дүүргийн 25 дугаар хороотой, баруун талаараа 6 дугаар хороотой, хойд талаараа 15 дугаар хороотой, зүүн талаараа 14 дүгээр хороотой хиллэдэг томоохон орон сууцны хорооллуудын нэг бөгөөд хороо нь байршлаараа нийт 9 хэсэгт хуваагддаг бөгөөд нийт 59 байрыг хариуцсан 9 Сууц Өмчлөгчийн холбоо, 1 Орон Сууц Нийтийн Аж Ахуй Хэрэглэгчидэд үйлчлэх төв үйл ажиллагаа явуулдаг.

     Тус хороо нь Засаг дарга Б.Мөнхзориг, зохион байгуулагч Н.Мөнхбат, Д.Загд, нийгмийн ажилтан Х.Айтансых, Н.Доржханд, Ө.Лувсанданзан, халамжийн мэргэжилтэн Э.Мөнхзул, ХХОН-ийн байцаагч Г.Оюунцэцэг нарын орон тооны албан хаагчтай.

     Тус хороо нь 9 хэсэгтэй, нэг хэсгийн ахлагч дундажаар 250 өрх хариуцан ажиллаж байна.

     Хорооны нутаг дэвсгэрт  Ерөнхий боловсролын 84 дүгээр сургууль, сургуулийн өмнөх боловсролын 129, 147 дугаар цэцэрлэг, Хавдар судлалын үндэсний төв, Монос фарм, Ази фарм, Ач фарм, Монголын алт  корпораци, Багануурын төлөөлөгчийн газар,  Ватиканы  төлөөлөгчийн газар зэрэг худалдаа үйлчилгээ болон нийтийн хоолны 200 гаруй цэг салбар үйл ажиллагаагаа явуулж байна.