Н.Баярмөнх “Аливаа ажлыг хийхэд сэтгэл, хандлага, бүтээлч санаачилга чухал байдаг”

Өнөөдөр /2021.07.06/ Баянзүрх дүүргийн хороодын Засаг дарга нарын шуурхай зөвөлгөөн болж өнгөрөгч 7 хоногт хороодын ажлыг үнэлэх нэгдсэн шалгалтын дүн, Ковидын нөхцөл байдал, хороодод хийгдэж байгаа хөрөнгө оруулалт, тохижилтын ажлын явц, бүх нийтийн амралтын өдрүүдээр үер усны аюулаас урьдчилан сэргийлэх зэрэг цаг үеийн асуудлаар дүүргийн Засаг дарга Н.Баярмөнх мэдээлэл хийж холбогдох чиглэл, үүрэг даалгаврыг өглөө.

Хурлын эхэнд хороодын Засаг дарга нар тулгамдаж байгаа асуудлуудын талаар ярилцаж орон нутгийн хэмжээнд шийдэж болох ажлуудын талаар санал солилцсон юм. Мөн иргэдээс дүүргийн Засаг даргад ирүүлсэн санал, гомдол, хүсэлтийг хэрхэн шийдвэрлэж байгаа талаар танилцуулсан юм.

Хурлын үеэр дүүргийн Засаг дарга Н.Баярмөнх “Аливаа ажлыг хийхэд сэтгэл, хандлага, бүтээлч санаачилга чухал байдаг. Дүүргээ өнгөтэй болгохын тулд бид 2030 он хүртлэх хөгжлийн төлөвлөгөөг гарган энэ дагуу ажлуудаа төлөвлөөд хийж байна. Цаг үе амаргүй байгаа хэдий ч хороо, анхан шатны түвшинд хийж хэрэгжүүлж болох бүтээлч ажил санаачлан, өөрсдийн нөөц бололцоогоо ашиглан ажиллах, иргэдийн санал санаачилгыг дэмжиж, иргэдээс ирүүлсэн өргөдөл гомдлыг түргэн шуурхай шийдвэрлэж ажиллах шаардлагатай байна” гэдгийг онцолсон юм.

Тамгын газрын дарга И.Баттөгс хороодын үйл ажиллагаанд хийсэн нэгдсэн шалгалтын дүн танилцуулж, цаашид иргэдэд төрийн үйлчилгээг түргэн шуурхай хүргэхэд юун дээр анхаарч ажиллах талаар чиглэл өгөв.  Хурлын төгсгөлд, дүүргийн Засаг дарга хороодод хийгдэж байгаа хөрөнгө оруулалт, бүтээн байгуулалтын ажлуудын чанар, гүйцэтгэлд хяналт тавих, иргэдэд хүнсний багцыг хүргэх ажлыг зохион байгуулах, хариуцсан ажилдаа сэтгэл гаргаж ажиллах, иргэдийн шинэ санаачилгыг дэмжиж ажиллахыг хороодын Засаг дарга нарт анхааруулснаар шуурхай зөвөлгөөн өндөрлөлөө.