ХАЯГДАЛ ГЯЛГАР УУТ ЦУГЛУУЛАН БҮТЭЭСЭН “ЗҮБИ” ТОГЛООМЫН ТАЛБАЙГ ХҮЛЭЭЛГЭН ӨГЛӨӨ

Хаягдал гялгар уут хүүхдийн тоглоомын талбай болон сүндэрлэлээ.

Баянзүрх дүүрэг Лантуун тохио ТББ, Пластик центр ХХК, Өнгө нэм ТББ-тай хамтран өнгөрсөн 8 дугаар сард “ЗҮГЭЭР БИТГИЙ ХАЯ” аяныг эхлүүлсэн.

Харин өнөөдөр уг аян амжилттай хэрэгжиж 12 дугаар хорооны хүүхдүүдэд “ЗҮБИ” хүүхдийн тоглоомын талбайг тохижуулж хүлээлгэн өглөө.

Хаягдал гялгар уутыг цуглуулж, дахин боловсруулснаар уг төслийн төсвийг бүрдүүлсэн бөгөөд хоёр сарын хугацаанд ийнхүү амжилттай хэрэгжүүлж дуусжээ.

Энэ үеэр дүүргийн Засаг даргын орлогч Г.Жаргалсайхан: “Баянзүрх дүүрэг хүүхдэд ээлтэй орчинг бүрдүүлэх олон ажлыг санаачлан хийж байна. Ирэх оноос хүүхэд хамгааллын төвлөрсөн байрыг ашиглалтанд оруулах, эрх нь зөрчигдөж буй хүүхдүүдийн сэтгэл заслын эмчилгээ цаашлаад Баянзүрх хүүхдийн зуслан зэрэг олон төслийг хэрэгжүүлэх болно. Эдгээр ажлуудыг нийгэмд үйлчилдэг Лантуун дохио болон бусад ТББ-уудтай хамтарч хэрэгжүүлэх болно. Маш зөв санаачлагыг гаргаж соргогоор харж энэ сайхан бүтээн байгуулалтыг хийж гүйцэтгэсэнд талархаж байна гэлээ.

#ХОГХАЯГДАЛ_ОРЧНЫБОХИРДОЛ_ХҮҮХДЭДЭЭЛГҮЙОРЧИН гэсэн 3 томоохон асуудлыг шийдвэрлэхэд хувь нэмрээ оруулахаар “ЗҮГЭЭР БИТГИЙ ХАЯ” аянг 5 жилийн хугацаанд хэрэгжүүлэх юм.

Дүүргийн 12 дугаар хороонд 15000 гаруй оршин суугчтайгаас 40 хувийг хүүхдүүд эзлэдэг. Тус хороонд хүүхдэд ээлтэй орчинг бүрдүүлж өгсөн та бүхэнд талархал илэрхийлье.