Баянзүрх дүүргийн удирдах ажилтнуудын 12 дугаар шуурхай хурал буюу 2023 оны отгон хурал өнөөдөр боллоо. Хурлыг Баянзүрх дүүргийн Засаг даргын орлогч Г.Жаргалсайхан удирдан явууллаа.
Баянзүрх дүүргийн Засаг даргын Тамгын газрын Төрийн захиргаа удирдлагын хэлтсийн дарга Э.Түвшинбаяр дүүргийн удирдах ажилтнуудын шуурхай хуралдааны үүрэг даалгаврын биелэлт, өргөдөл гомдол, албан бичгийн шийдвэрлэлтийн мэдээг танилцуулсан. 2023 онд нийтдээ 11 удаагийн шуурхай хуралдаан болж 5 чиглэлээр 103 үүрэг даалгавар өгөгдсөн бөгөөд хэрэгжилтийн биелэлт 63 хувьтай байна. Харин өргөдөл гомдол, албан бичгийн шийдвэрлэлт 97.4 хувьтай байгааг хэллээ.
Баянзүрх дүүргийн Эко тохижилт үйлчилгээ ОНӨААТҮГ-ын дарга Ж.Батболд шуурхай хуралдааны үеэр мөн танилцуулга хийлээ. Хот нийтийн аж ахуйн нэгдмэл байдлыг хангах, чиг үүргийн хамаарлыг оновчтой байдлаар хуваарилалт хийх хүрээнд Улаанбаатар хотын Захирагчийн ажлын албаны хариуцаж байсан зарим чиг үүргийг Баянзүрх дүүрэгт шилжүүлсэн. Энэ хүрээнд Баянзүрх дүүргийн Эко тохижилт үйлчилгээ ОНӨААТҮГ нь таван хэлтэс алба, зам талбайн 65 албан хаагчтайгаар үйл ажиллагаа явуулж байна. Нийт 114,2 км буюу 1,085,000 м.кв зам талбайн цэвэрлэгээ үйлчилгээг хариуцдаг. Тэгвэл дээрх шийдвэрийн хүрээнд Хот нийтийн аж ахуйн хэлтсээс 88 ажилтан албан хаагч шилжин ирж, хариуцсан зам талбай нэмэгдэж байгаа. Тиймээс энэ талаарх мэдээллийг удирдах ажилтнуудад өгсөн юм.
Шуурхай хурлын төгсгөлд холбогдох асуудлаар асуулт саналтай дарга нар асуултаа асууж, хариулт авсан бол Засаг даргын орлогч Г.Жаргалсайхан нийслэлээс хариуцдаг байсан зам талбайн арчилгаа, цэвэрлэгээний ажил дүүрэг рүү шилжин ирж байгаатай холбоотойгоор хорооны Засаг дарга нарын үүрэг хариуцлага нэмэгдэж байгааг хэлсэн юм.
