“Эх орны минь тусгаар тогтнол, батлан хамгаалах үүрэг бидэнд ирж байна гэж бодохоор бахархалтай ч сандарч байна. Үеийн найзуудтайгаа хамт цэргийн үүрэгтний үнэмлэхээ хүндэтгэлтэйгээр гардан аваад эрийн цээнд хүрлээ дээ гэсэн омогшил төрж байна. Сая албаны хүмүүс цэргийн албыг биеэр хаахаас гадна өөр олон төрлөөр хааж болно гэдгийг хэлсэн. Үеийн найзууддаа хандаж хэлэхэд заавал ямар нэг байдлаар цэргийн албаа хаагаарай” хэмээн шинэхэн 18 настан ярьсан юм. Тэрээр Баянзүрх дүүргийн хэмжээнд цэргийн алба хаах насанд хүрсэн залуусын төлөөлөл.
Нийслэлийн хэмжээнд энэ оны цэргийн бүртгэл явагдаж дууслаа. Цэргийн алба хаасан болон шинээр цэргийн алба хаах насанд хүрч буй иргэдийг бүртгэлжүүлсэн. Үүнтэй холбоотойгоор Баянзүрх дүүргийн хэмжээнд 18 нас хүрч буй 500 залууст цэргийн үүрэгтний үнэмлэх гардуулах хүндэтгэлийн арга хэмжээг зохион байгууллаа.
Арга хэмжээнд хороо бүрийн төлөөлөл 18 настай залуус ирсэн бол тэднийг хүндэтгэн Нийслэлийн Засаг даргын Тамгын газрын Цэргийн штабын орлогч, хурандаа Б.Эрдэнэпил болон Баянзүрх дүүргийн Засаг даргын Тамгын газрын Цэргийн штабын дарга, дэд хурандаа Л.Гантогтох болон 43 хорооны Засаг дарга нар оролцлоо.
Мөн арга хэмжээний үеэр Монгол цэргүүд дэлхий нийтийн хэмжээнд хэрхэн алдар нэр хүрч Энхийг сахиулах ажиллагаанд амжилттай оролцож байгаа талаарх баримтат киног үзүүллээ
Leave a comment