Хүүхэд багачуудыг спортоор хичээллэхийг дэмжсэнээр гэмт хэрэгт өртөх магадлал буурах сайн талтай. Тийм ч учраас Баянзүрх дүүргийн иргэдийн Төлөөлөгчдийн Хурал, Гэмт хэргээс урьдчилан сэргийлэх ажлыг зохицуулах салбар зөвлөлөөс тийболлын спортыг дүүргийн Ерөнхий боловсролын сургуулиудад дэлгэрүүлэхийг дэмжин ажилладаг. Тиймээс Баянзүрх дүүргийн зарим сургуулийн сурагчид энэхүү спортоор амжилттай хичээллэж, нэлээдгүй амжилт гаргаад байгаа юм.
Мөн энэ жил Япон улсад зохион байгуулагдах Тийболлын Азийн аварга шалгаруулах тэмцээнд оролцох томоохон сорил тийболлын тамирчин сурагчдын өмнө бий. Тийм ч учраас хүүхдүүдэд Япон соёлыг илүү ойртуулах зорилгоор 69 дүгээр сургуульд Япон хэлээр ярьж сурах клубийг нээн ажиллуулахаар боллоо.
Энэхүү үйл ажиллагааг Жайка олон улсын байгууллагатай хамтран хэрэгжүүлж байгаа бөгөөд сайн дурын Япон багш хичээл заах юм. Клубийн нээлтэд Баянзүрх дүүргийн иргэдийн Төлөөлөгчдийн Хурлын дарга А.Баяр оролцлоо.
Мөн энэ үеэр Тийболлын спортыг сурталчлан таниулахаар тамирчин хүүхдүүд, эцэг эхчүүд, багш нарын дунд нөхөрсөг тоглолт зохион байгуулагдлаа.
Leave a comment