Ирэх оны нэгдүгээр сарын 1-ний өдрөөс мөрдөж эхлэх Хөдөлмөрийн хуулийн шинэчилсэн найруулгыг танилцуулах анхдугаар сургалтыг Баянзүрх дүүрэгт зохион байгуулж байна.
Одоо мөрдөгдөж байгаа Хөдөлмөрийн тухай хуулиар ажил олгогч, ажилтан хоорондын хөдөлмөрийн харилцааг зохицуулдаг байсан бол шинэчилсэн найруулгаар олон талын хөдөлмөрийн харилцааны асуудлыг зохицуулахаар тусгажээ.
Тухайлбал албан бус салбарт ажиллагсдын харилцааг зохицуулах заалтууд, малчин, туслах малчид хоорондын байгуулах гэрээ зэрэг харилцааг зохицуулсан шинэлэг заалтууд нэмэлтээр орсон байна.
Харин ажил олгогчдын хувьд Хөдөлмөрийн тухай хуулийн 17-р заалтыг анхаарах шаардлагатай. Тус заалтад мэргэжилтэн, ажилтан бэлтгэх, ажлын байраар хангах зэрэг чиглэлийн заалтууд орсон байгаа талаар Ажил олгогч, эздийн нэгдсэн холбооноос онцлоод ажил олгогч, ажилтны аль алиных нь эрх үүргийг тэнцвэржүүлсэн хууль болсон талаар хэллээ.
Тус сургалтаар уг хуулийн онцлох зохицуулалтыг танилцуулж, ерөнхий ойлголт өгөх зорилготой бөгөөд цаашид 21 аймагт 11, 12 дугаар саруудад зохион байгуулагдах юм.
Leave a comment