Сууц өмчлөгчдийн холбоодын үйл ажиллагааг сайжруулах чиглэлээр Баянзүрх дүүргээс тодорхой ажлуудыг зохион байгуулж байна.
Оршин суугчдын дунд СӨХ-тэй холбоотой олон санал гомдол байдаг. Жишээ нь эрсдэл үүсэхэд хариуцах эзэнгүй болох зэргээр хохирох асуудал түгээмэл байдаг. Тэгвэл тус асуудлыг бүрэн шийдвэрлэхээр дүүргийн Хөгжлийн төвөөс “Таны индэр” явуулын өдөрлөгийг дүүргийн 21 хороодтой хамтран зохион байгуулж байна.
Уг аяны хүрээнд СӨХ-дыг даатгалд хамруулснаар иргэдийн орон сууцанд өөрсдийн зүгээс шалтгаалахгүй хохирол учирсан тохиолдолд даатгалын сангаас бүрэн хариуцах болж байгаа юм.
СӨХ иргэдээ даатгалд хамруулж, санхүүгийн эрсдлийг нь бууруулснаар эргээд СӨХ-ын эрх зүйн байдал, төлбөр төлөлтийн чадвар нь нэмэгдэх үр дүнтэй гэж үзэж байгаа юм.
Мөн шаардлагатай үед холбоо барихад хүндрэл үүсдэг байсныг Юнител үүрэн сүлжээний оператортой хамтран нэгдсэн дуудлагын утастай холбож өгснөөр ажлын бус цагаар ч дуудлага, мэдээлэл өгөхөд хялбар болж байна.
Тодруулбал СӨХ-дыг нэгдсэн дугаараар хангаж, лавлагааны операторуудад холбож өгснөөр иргэд лавлах үйлчилгээний тусгай дугааруудаас өөрийн харьяа СӨХ-ын холбоо барих мэдээллийг авах боломжтой болж байна.
Өнөөдрийн “Таны индэр” явуулын өдөрлөг 26 дугаар хороонд зохион байгуулагдаж тус хорооны 27 хотхоны 31 СӨХ оролцлоо.
Leave a comment