Хаврын мод тарилтын үйл ажиллагаа удахгүй эхэлнэ. Үүнтэй холбоотойгоор Баянзүрх дүүрэг ногоон байгууламж нэмэгдүүлэх, мод тарьж, ургуулах чиглэлд мэргэжлийн байгууллагатай хамтран хэлэлцүүлэг зохион байгууллаа. Хэлэлцүүлэгт дүүргийн Засаг дарга Н.Баярмөнх, орлогч дарга Г.Жаргалсайхан, холбогдох дүүргийн алба хэлтсийн удирдлага, хорооны удирдлага, мэргэжлийн байгууллага төлөөлөл оролцлоо.
Хэлэлцүүлгийн үед “Айл бүрийн хашаанд 10 мод” санаачилгыг илүү үр дүнд хүргэхийн тулд үлгэр жишээ мод тарьдаг иргэдтэй гэрээ хийж, шинээр мод тарьж буй айл өрхүүдэд зөвлөгөө өгөх, тарьсан мод бүрийг эзэнжүүлж, ургуулах тал дээр санаачилга гаргахаар болсон. Тэгж чадвал багадаа 5000 айлын хашаа бүрд 10 мод ургаж нийт 50.000 модыг эзэнжүүлж, ургуулах боломжтой байна. Мөн дүүргийн хэмжээнд нийтийн эзэмшлийн ногоон байгууламж, арчлалтыг хариуцдаг Баянзүрх Эко тохижилтоос ногоон байгууламжтай бүсүүдэд мод, бут тарихаас гадна, мод үржүүлэх ажлыг амжилттай хэрэгжүүлж байна.
Түүнчлэн Баянзүрх дүүргийн 23,28 дугаар хорооны 300га талбайд баригдаж буй Олон улсын эко цэцэрлэгт хүрээлэнгээс тарьж, ургуулах мод, төгөлийн төлөвлөгөө, мэргэжлийн байгууллага, аж ахуйн нэгжүүдтэй хамтран хийх арга хэмжээний талаар мэдээлэл өглөө.
Дүүргийн Засаг дарга Н.Баярмөнхийн зүгээс 2024 оны хаврын мод тарилт мэргэжлийн байгууллага, иргэдийн идэвх, оролцооны үр дүнд бүтээмж өндөр байх болно гэдгийг хэллээ. Мөн иргэн бүрийг “АЙЛ БҮРИЙН ХАШААНД 10 мод” уриалгад нэгдэхийг уриаллаа.
Leave a comment