Баянзүрх дүүргийн Засаг дарга Н.Баярмөнх, удирдлагын баг 4-р сарын иргэдтэй хийх уулзалтаа зохион байгууллаа

Иргэдийн өмнө тулгамдаж буй асуудлыг шийдвэрлэх, санал хүсэлтийг нь хүлээн авах үүднээс энэхүү уулзалтыг тогтмол зохион байгуулдаг.

Уулзалтын өмнө иргэдийн асуудал хэрхэн шийдвэрлэгдсэн талаарх мэдээллийг танилцуулдаг. Өмнөх уулзалтад оролцсон иргэдээс газрын асуудлаар 19, нийгмийн халамжийн чиглэлээр хоёр, тохижилт дэд бүтэц, нийтийн аж ахуйтай холбоотой асуудлаар 12 иргэн тус тус хандсан. Үүнээс найман иргэний асуудал нь шийдвэрлэгдсэн бол 22 нь судлагдах шатанд явж байна.

Өнөөдрийн уулзалтад оролцсон иргэдээс дүүрэг, орон нутагтай хамтран ажиллах чиглэлээр санал дэвшүүлсэн иргэдийн талаарх мэдээллийг хүргэе. Баянзүрх дүүргийн 25 дугаар хорооны иргэн О.Энхмаа захын хороодын иргэдэд үйлчлэх эмнэлэг байгуулахаар төлөвлөн, зураг төсөл боловсруулсан. Энэхүү төслөө танилцуулсан. Архины хамааралтай иргэдийг нийгэмшүүлэх чиглэлээр үйл ажиллагаа явуулдаг “Сэргэлт-Өөд” Төрийн бус байгууллагаас хамтран ажиллах, иргэдийг ажлын байранд зуучлах, энэ хүрээнд тодорхой ажил зохион байгуулахыг хүслээ.

Баянзүрх дүүргийн 39 дүгээр хорооны иргэн Г.Ядамсүрэн Тэнгэр худалдааны төвийн хажууд байрлаж буй зүүн авто зогсоолоос үүдэж Баянзүрх хотхоны 3000 гаруй иргэний эрх зөрчигдөж байгааг хэлсэн. Энэ мэтчилэн зарим иргэдээс өгсөн санал хүсэлттэй холбоотойгоор тухайн байршилд очиж ажиллахаар боллоо.

Иргэдтэй хийх уулзалтад Баянзүрх дүүргийн Засаг дарга Н.Баярмөнх, Засаг даргын Тамгын газрын дарга И.Баттөгс болон дүүргийн харьяа хэлтсийн удирдлагууд оролцлоо гэж Баянзүрх дүүргээс мэдээллээ