Уулзалтын эхэнд иргэдээс өгсөн санал хүсэлтийн шийдвэрлэлтийг танилцуулсан. Өмнөх уулзалтад оролцсон иргэдээс 7 иргэн асуудлаа бүрэн шийдүүлсэн. Одоо 9 иргэний асуудал шийдвэрлэх шатанд явж байна. Цаашид энэхүү уулзалтад оролцож санал хүсэлтээ өгч байгаа бүх иргэдийн асуудлыг шийдвэрлэх хэрэгтэйг засаг дарга үүрэг болголоо. Энэ удаагийн уулзалтад оролцсон иргэдийн дийлэнх хувь газартай холбоотой асуудлаар хандсан. Газар зохион байгуулалтын 1,2 дугаар албаны дарга нар иргэдэд хариулт өгөхөөс гадна газар зохион байгуулагч нар зарим иргэний асуудлыг газар дээр нь шийдвэрлэж ажиллалаа.
15 дугаар хорооны иргэн н.Баярсайхан дулаан автобусны буудал барих хүрээнд дүүрэгтэй хамтран ажиллах саналтай байгаагаа илэрхийлсэн. Баянзүрх дүүргийн 9 дүгээр хороо Шархадны эцсийн автобусны буудал дээр энэхүү төслийг хэрэгжүүлсэн бөгөөд цаашид хэд хэдэн байршилд хийхээр болсон.
34 дүгээр хорооны иргэн н.Энхцэцэг зуны дэлгэр цагт тарьсан хүнсний ногоогоо худалдан борлуулах хүсэлтэй байгаагаа илэрхийлсэн. Түүний хувьд оршин суугчдыг нэгтгэсэн бүлэг байгуулж зундаа ногоо тарьдаг. Цаашид энэ чиглэлээр үйл ажиллагаа явуулах иргэдэд зөвлөгөө өгч, сургалт зохион байгуулах боломжтойг ч хэлсэн.
Мөн залуучуудын төлөөлөл болж н.Золбоо хэд хэдэн асуудлаар санал хүсэлтээ хэллээ. Тухайлбал эрүүл мэндийн болон бусад асуудлаас болж цэрэгт явах боломжгүй байгаа залуучууд руу чиглэсэн арга хэмжээ зохион байгуулах, эрүүл мэндийн асуудалд анхаарал хандуулах хэрэгтэйг тэрээр хүссэн юм.
Иргэдээс өгч байгаа эдгээр санал хүсэлтийг Засаг дарга хүлээн авсан бөгөөд хамтран ажиллах боломжтой гэдгийг хэлсэн юм.
Үүнээс гадна иргэдийн асуудлыг сонсоод өнгөрөх бус шийдвэрлэж ажиллах хүрээнд газар дээр очиж ажиллахыг холбогдох хэлтсийн дарга нарт үүрэг болголоо.
Удахгүй Монгол түмний уламжлалт сар шинийн баяр болно. Үүнтэй холбоотойгоор авто зам болон явган хүний зам талбайг цэвэрлэх ажлыг дүүргээс зохион байгуулж байна. Энэхүү ажилд иргэд, аж ахуй нэгж байгууллага, сууц өмчлөгчдийн холбоодыг идэвхтэй оролцохыг уриаллаа.
Leave a comment