Хороодын хэсгийн ахлагчтай бүсчилсэн уулзалт хийлээ
УИХ-ын гишүүн, Засгийн газрын гишүүн, Хот байгуулалт, барилга, орон сууцжуулалтын сайд Э.Бат-Амгалан, Баянзүрх дүүргийн Засаг дарга Г.Жаргалсайхан болон холбогдох удирдлагууд хороодын хэсгийн ахлагчтай бүсчилсэн уулзалт зохион байгууллаа. Уулзалтыг дүүргийн зүүн, төв, баруун бүс гэж хэсэгчилсэн байдлаар хийсэн бөгөөд өмнөх жилүүдэд хэрэгжүүлсэн ажил, бүтээн байгуулалт, хөрөнгө оруулалтын ажлын үр дүнг танилцуулж, ирэх онд төлөвлөгдөж буй ажлуудын талаар мэдээлэл өглөө.
Хэсгийн ахлагчид бол зөвхөн мэдээлэл дамжуулагч биш өрхийн бодит асуудалд хүрч ажилладаг, ахмад настанд тусалж, хөгжлийн бэрхшээлтэй иргэдийн хэрэгцээг сонсож, архины хамааралтай иргэд болон нийгмийн эмзэг бүлэгт хамаарах өрхүүдэд анхаарал халамж тавьж, тус дэмжлэг үзүүлдэг хүмүүс билээ. Уулзалтын үеэр хэсгийн ахлагчид тулгамдаж буй асуудлуудаа илэн далангүй хэлэлцэж, иргэдийн санал санаачилгыг бодит шийдэлд хүргэх боломжийн талаар санал бодлоо солилцсон юм.
Мөн энэ үеэр холбогдох удирдлагууд зарим хороодод тулгамдаад байгаа асуудалд тодорхой хариулт өгч, шийдвэрлэж ажиллалаа. Энэхүү уулзалт нь иргэдэд төрийн үйлчилгээг илүү хүртээмжтэй болгоход хороодын хэсгийн ахлагчдын идэвх оролцоог нэмэгдүүлэхэд чиглэснээрээ онцлог аж.
Leave a comment